Хураангуй:
Зорчигч тээврийн салбарт өрсөлдөөн нэмэгдэж буй нөхцөлд өрсөлдөх чадвараа дээшлүүлэх, зах зээлд эзлэх хувиа өсгөх, түүнийг хадгалах, үйлчилгээгээрээ өрсөлдөх асуудал төмөр замын зорчигч тээврийн байгууллагын өмнө тулгамдаж байна. Энэ асуудлыг шийдэхийн тулд төмөр замын зорчигч үйлчилгээний чанарын түвшинг хэмжин тодорхойлох шаардлага бий болоод байна. Иймээс Монгол улсад төмөр замын зорчигч тээврийн үйлчилгээ үзүүлж буй Монгол-Оросын Хувь Нийлүүлсэн Нийгэмлэг Улаанбаатар Төмөр Замын үйлчилгээний чанарын түвшинг судалж, үйлчилгээний чанарыг дээшлүүлэх талаар санал зөвлөмж боловсруулах зорилгоор энэхүү судалгааны ажлыг хийлээ.
Онолын болон салбарын судалгаа хийхдээ анхдагч болон хоёрдогч эх сурвалж дээр үндэслэн баримт бичгийн болон харьцуулалтын аргыг ашигласан. Онолын судалгаанд үндэслэн үйлчилгээний чанарын эмпирик судалгааны загварыг санал болгосон. Эдгээр загваруудын дагуу үйлчилгээний чанарын хүлээлт, бодит үйлчилгээний үнэлгээг хэмжиж чанарын зөрүүг тодорхойллоо. Зорчигч үйлчилгээний чанарыг хэмжих загваруудын талаар онол арга зүйн үүднээс судалж, тохиромжтой загварыг боловсрууллаа. Төмөр замын зорчигч үйлчилгээний чанарыг хэмжих SERVQUAL загвараар УБТЗ ХНН-ийн үйлчилгээний чанарыг тодорхойлов. Хэрэглэгчийн судалгааг цахим хэлбэрээр авч, нийт 410 хүн хамрагдлаа.
Ийнхүү судалгааны үр дүнд үндэслэн төмөр замын зорчигч үйлчилгээний хэмжээнд цаашид авч хэрэгжүүлэх үйлчилгээний чанарыг сайжруулах, хадгалах талаар санал зөвлөмжийг боловсруулав. Монгол-Оросын ХНН УБТЗ нь дараах санал болгож буй үйлчилгээний чанарыг хэмжих загварыг үйл ажиллагаандаа хэрэглэх, өрсөлдөх чадвараа дээшлүүлэх, үйлчилгээний чанараа сайжруулах, хэрэглэгчийн сэтгэл ханамжийг дээшлүүлэх бодлого, арга хэмжээг авч хэрэгжүүлэх боломжтой гэж үзэж байна.
