ХАМТЫН ОФФИСЫН БИЗНЕС ЗАГВАРЫГ ТОДОРХОЙЛОХ НЬ

Abstract

Хамтын оффис нь сүүлийн хориод жилийн хугацаанд хурдацтай өсөлтөөрөө үл хөдлөх хөрөнгийн салбарынхны анхаарлыг ихээр татаж буй бизнес юм. Хамтын оффис нь үл хөдлөх хөрөнгийн түрээс болон үйлчилгээний бизнесийг хослуулдаг. Гишүүддээ ганцаардмал мэдрэмж төрүүлэхгүй тэдэнд оффист шаардлагатай хангамж, тоног төхөөрөмжийг хямд өртгөөр, уян хатан нөхцөлтэйгөөр санал болгодог оффис түрээсийн үйл ажиллагаа юм. Энэ бизнес хурдан өсөлттэй байх шалтгаан нь дэлхий нийтээр зөөврийн компьютер, дижитал технологийн хөгжил нь алсын зайнаас ажиллагчдын тоо өсөхөд хүргэсэнээс үүдэлтэй. Интернетийн хөгжил нь дэлхийн эдийн засагт нөлөөлж, үүний үр дүнд янз бүрийн оролцогчдын хөрөнгө хуваах үзэгдэл түгээмэл болж байна (Puschmann & Alt, 2015). Энэ үзэгдлийг “хуваалцах эдийн засаг” гэж нэрлэдэг. Хамтын хэрэглээ гэдэг нөөцийг түрээслэх замаар нь эзэмшилгүйгээр түрээслэх, хуваалцах, солилцох замаар бий болсон (Lessig, 2008, p. 143). Мөн “гиг эдийн засаг” буюу байгууллага болоод хувь хүмүүс богино хугацаанд хамтран ажилладаг чөлөөт зах зээлийн тогтолцоо зэргийн нөлөөгөөр хамтын оффисын бизнес хөгжин бий болсон. Манай улсын хувьд хамтын оффис нь шинэхэн салбар юм. Улс орны эдийн засгийн өсөлт, жижиг дунд бизнесүүдийн өсөлт, инновацитай холбоотой төрийн бодлого хэрэгжилтүүд болон дижитал шилжилттэй холбоотойгоор энэ төрлийн бизнес цаашид өсөлттэй байна гэж үзсэн тул хамтын оффис ажиллуулахаар сонирхож буй компаниудад бизнес загвараа тодорхойлоход энэ чиглэлийн судалгааны ажил хэрэгтэй гэж үзэн энэхүү судалгааг хийлээ.