ОЮУТНЫ СЭТГЭЛ ХАНАМЖ, ТҮҮНД НӨЛӨӨЛӨГЧ ХҮЧИН ЗҮЙЛС: ЛОГИТ РЕГРЕССИЙН ШИНЖИЛГЭЭ

Abstract

Монголчууд бид олон улсын түвшинд, дэлхийн тавцанд бусад улс оронтой өрсөлдөхөд хэрэг болох хамгийн чухал зэвсэг бол мэдлэг, боловсрол байдаг. Тиймдээ ч эдийн засаг, нийгмийн сайн сайхан байдлыг хэмждэг гол хүчин зүйлсийн нэг нь боловсролын төвшин байдаг. Ялангуяа дээд боловсролын секторын олгож буй боловсролын чанар үндэсний өрсөлдөх чадварыг нэмэгдүүлдэг гол хэрэгсэл юм. Уг судалгааны хүрээнд дээд боловсролын салбарын гол оролцогч болох оюутны сэтгэл ханамжийг судалж, түүнд нөлөөлдөг хүчин зүйлсийг судлахаар зорьсон болно. Судалгаанд СЭЗИС-ийн оюутнуудаас санамсаргүй түүвэрлэлтийн аргаар нийт 468 оюутны өгөгдөл дээр логит регрессийн шинжилгээ хийлээ. Нийт өгөгдлийг хүн амзүйн болон дотоод, гадаад хүчин зүйл хэмээн хоёр бүлэг үүсгэн тус тусад нь шинжилгээ хийсэн болно. Үнэлгээний үр дүнд эмэгтэй оюутан эрэгтэй оюутнаас илүү сэтгэл ханамж өндөртэй байдаг бол мэргэжлээ өөрөө сонгох нь бусдын зөвлөгөөг даган сонгосноос илүү мэргэжилдээ дуртай, сэтгэл ханамж өндөртэй байдаг байна. Багшийн заах арга барил, сургуулийн тэтгэлэгт хамрагдах боломж, компьютер техник тоног, төхөөрөмж болон сургуулийн орчин зэрэг хүчин зүйлс оюутны сэтгэл ханамжтай байдалд нөлөөлдөг байна.