Байгаль орчин, нийгэм, засаглалын дотоод үнэлгээний аргачлал боловсруулах нь: Барилгын салбарын жишээн дээр

Abstract

Орчин цагийн бүх бизнесийн байгууллагууд байгальд ээлтэй, эрүүл, ногоон байгууллага байхыг чухалчлан үздэг болсон билээ. Энэ нь тогтвортой хөгжлийн бодлоготой холбоотой бөгөөд тус чиглэлийн дагуу ногоон санхүүжилт, ногоон төслүүд нэн чухал болж байна. Манай улсын хувьд нийслэл Улаанбаатар хотын агаар болон хөрсний бохирдол томоохон асуудал болж буй бөгөөд тус асуудлын 80 орчим хувь нь гэр хорооллын зохион байгуулалтаас шалтгаалдаг байна. Тус асуудлыг шийдэхэд хувь нэмэр болохуйц гаднын төслийн санхүүжилт манай улсад орж ирэх боломж өмнө жилүүдийг бодоход харьцангуй өссөн ч Монгол дахь компаниудын хувьд тогтвортой хөгжил, ногоон санхүүжилтийн талаар мэдээлэл дутмаг байна. Ийм учраас компанийн зүгээс санхүүжилт олгогчдын шаардлагад тохирсон байгаль орчин, нийгэм, засаглалын үнэлгээний дотоод аргачлал боловсруулахаар тус судалгааны ажлын зорилгыг тодорхойлсон. БОНЗ-ийн дотоод үнэлгээний аргачлалыг Vigeo Eiris олон улсын БОНЗ-ын үнэлгээний байгууллагаас гаргасан аргачлалын хүрээнд дотоодын барилгын салбарт тохируулан боловсруулав. Үүнд салбарын төлөөлөл болохуйц Монголын Хөрөнгийн Бирж дээрх томоохон барилгын компаниудыг сонгон анкетын судалгаа хийж, тус компаниудын цаашдын БОНЗ-ын хандлага тодорхойлохыг тус судалгааны хүрээнд хийж гүйцэтгэв.