ГОО САЙХНЫ БРЕНД ХЭРЭГЛЭГЧДИЙН ХУДАЛДАН АВАЛТ БА НИЙГМИЙН СҮЛЖЭЭН ДЭХЬ НӨЛӨӨЛЛИЙН МАРКЕТИНГИЙН ХАМААРЛЫГ ТОДОРХОЙЛОХ СУДАЛГАА /“ZAYA BILGEE” БРЕНДИЙН ЖИШЭЭ ДЭЭР/

Abstract

Техник технологи хөгжихийн хэрээр олон нийтийн сүлжээ улам эрчээ авч хүмүүсийн өдөр тутмын зайлшгүй хэрэглээ болж байна. Тийм ч учраас уламжлалт маркетингийн чиг хандлага нь олон нийтийн сүлжээ тэр тусмаа Фэйсбүүк, Инстаграм болон Нөлөөлөгчдөөр солигдож байна. Монгол улсад хийгдсэн МОНГОЛЧУУДЫН СОШИАЛ МЕДИА ХЭРЭГЛЭЭ – 2020 судалгаа дээр сүүлийн жилүүдэд Монголчуудын олон нийтийн сүлжээнд зарцуулах цаг нь ихэссэн бөгөөд томоохон аж ахуй нэгжүүдийн 84% нь дижитал сувагт зарцуулах төсвөө цаашид нэмэгдүүлнэ гэсэн үр дүнгүүд гарсан байна. Бага зардлаар их бүтээмжтэй байх үүднээс олон нийтийн сүлжээний гол хэрэгсэл болсон сошиал нөлөөлөгчдийг ихэнх компаниуд бүтээгдэхүүнээ сурталчлан таниулахад ашигладаг болсон. Сошиал нөлөөлөгчдөөр дамжуулан гоо сайхны бренд бүтээгдэхүүний талаар мэдээлэл авах нь элбэг байдаг бөгөөд энэ хэрэгцээн дээр тулгуурлан гоо сайхны бренд хэрэглэгчдийн худалдан авалтад олон нийтийн сүлжээн дэх нөлөөлөгчдийн хамаарлыг нь судлах нь зүйтэй гэж үзсэн. Энэ чиглэлээр судалсан ижил төрлийн судалгаа Монголд нийтлэг биш тул шинэлэг сэдэв юм. Судалгааны арга зүйн хувьд тоон болон туршилтын судалгаа хослуулан хийгдсэнээрээ онцлогтой. Энэхүү судалгааны үр дүнд гоо сайхны бренд болон нөлөөлөгчийн маркетинг хоёрын хоорондын хамаарлыг тодорхойлохоос гадна Zayabilgee брендийг сурталчилж буй нөлөөлөгчдийг бусад брендийн нөлөөлөгч нартай харьцуулан нөлөөллийн тодорхойлон санал, зөвлөмж боловсруулсан болно.