Хураангуй:
Судалгааны хүрээнд сүлжээ дэлгүүрийн хүргэлтийн үйлчилгээ хэрэглэгчдийн сэтгэл ханамжийг тодорхойлоход ямар хүчин зүйлс нөлөөлдөг болохыг онолын судалгаанд тулгуурлан судалгааны дизайн боловсруулж, хүргэлтийн үйлчилгээ хэрэглэгчдийн сэтгэл ханамжийг тодорхойлох эмпирик судалгаа хийн шинжилж, худалдааны салбарт үйлчилгээ үзүүлж буй сүлжээ дэлгүүрүүдэд санал зөвлөмж боловсруулсан.
Онолын судалгааны хүрээнд дотоодын болон гадаадын судлаачдын судалгаанаас хүргэлтийн үйлчилгээний сэтгэл ханамжийг судалж WeiHua, ZhouJing (2015) болон Cihan, Cosar (2017) нарын судалгааны арга зүйд тулгуурлан судалгааны загвараа боловсруулсан. Салбарын судалгааны хүрээнд МУ-ын худалдааны салбар болоод тус салбарт хүргэлтийн үйлчилгээ эрхэлж буй сүлжээ дэлгүүрүүдийн талаар судалсан. Эмпирик судалгааны өгөгдлийг асуулгын аргаар Google Forms ашиглан цуглуулсан ба нийт 395 түүвэрт шинжилгээ хийсэн. Онолын судалгаанд үндэслэн сэтгэл ханамжийг 7 хүчин зүйлээс хамааруулсан загварын дагуу шинжилсэн.
Судалгааны голлох үр дүнг авч үзвэл сүлжээ дэлгүүрүүдийн хүргэлтийн үйлчилгээний сэтгэл ханамжид хүргэлтийн мэдээллийн чанар, хүргэлтийн хугацаа, хүргэлтийн найдвартай байдал, хүргэлтийн ажилтны нөлөө, хүргэлтийн үнэ, төлбөр төлөх боломж зэрэг хүчин зүйлс нь эерэг хамааралтай, хүргэлтийн бүтээгдэхүүний мэдээлэл нь хэрэглэгчдийн сэтгэл ханамжид мэдэгдэхүйц эерэг хамааралтай үр дүн гарсан бөгөөд судалгааны хүрээнд дэвшүүлсэн 7 таамаглал нь сэтгэл ханамжид эерэг хамааралтай үр дүн гарч батлагдсан.
