Хураангуй:
Үнэ цэнэ хэмээх ойлголтыг онолын хүрээнд олон хувилбараар тайлбарласан байдаг ба
“Үнэ цэнэ нь харьцангуй субьектив шинж чанартай бөгөөд хэрэглэгчийн үнэлэмжээр
тодорхойлогдох боломжтой” гэсэн хувилбарт үндэслэн аливаа бүтээгдэхүүн,
үйлчилгээний үнэ цэнийг хэрэглэгчдийн сэтгэл ханамжийн түвшингээр хэмжиж, тоон
утгаар илэрхийлэх боломжтой гэж дүгнэж болох юм. Энэхүү хувилбарын дагуу
бүтээгдэхүүн, үйлчилгээний үнэ цэнийг бүрдүүлж буй элемент тус бүрийг тоон утгаар
илэрхийлж, улмаар нийт дүнд эзлэх хувийн жинг нь тогтоосноор санхүүгийн
мэдээлэлтэй уялдуулан шинжлэх боломж бүрдэх юм.
Энэхүү судалгааны ажлыг Мэдээлэл, харилцаа холбооны салбарын төлөөлөл болох
телевизийн олон суваг дамжуулах үйлчилгээний салбарын 2018-2019 оны мэдээлэлд
үндэслэн хийж гүйцэтгэснээр өртөг, зардлын бүтцийг шинэлэг арга замаар шинжлэх,
удирдлагын шийдвэр гаргалтыг дэмжихэд чиглэгдсэн санал, зөвлөмжийг
боловсруулахыг зорьсон.
