Хадгаламж эзэмшигчдийн зан төлөвийн судалгаа

Abstract

Зах зээлийн эдийн засгийн үед мөнгө чухал үүрэг гүйцэтгэдэг билээ. Мөнгө нь олон функцтэй байдгийн нэг нь хуримтлалын хэрэгсэлийн үүрэг юм. Манай орны хувьд хамгийн их мөнгө эргэлддэг, өндөр хөгжсөн, өрсөлдөөн ихтэй салбар бол яах аргагүй банкны салбар юм. Энэ зах зээлд банкууд хадгаламж татах буюу эх үүсвэр татах өрсөлдөөн ямагт явагдаж байдаг. Нийт хадгаламжийн дансны 96 орчим хувь нь системийн таван банканд байршиж байдаг нь хадгаламжийн зах зээл дээрх цөөн тооны том банкуудын ноёрхол тогтсон болохыг харуулж байна. Хүмүүс жижиг банкуудад мөнгөө хадгалуулах нь бага байгаа нь зарим төлбөрийн чадвар сайтай жижиг банкуудын хувьд үйл ажиллагаагаа өргөжүүлэхэд саад болж байгаа юм. Харилцагчид мөнгөн хөрөнгөө хадгаламжинд хадгалуулахад олон төрлийн сонголтуудтай учирдаг. Тиймээс тэр сонголтуудад ямар хүчин зүйлс нөлөөлдөг гэдгийг тогтоох нь чухал юм. Энэхүү судалгааны ажлаар Монгол улсын арилжааны банкуудын хугацаат хадгаламж эзэмшигчдийн банк сонгох шийдвэр гаргалтанд нөлөөлж буй хүчин зүйлсийг судлах замаар хугацаат хадгаламж эзэмшигчдийн хадгаламж нээлгэх, хадгаламжаа нэмэгдүүлэхэд хандаж буй хандлага, зан төлөвт нөлөөлөгч хүчин зүйлсийг тодорхойлсон болно.