Хураангуй:
Эрүүл мэндийн салбарын үйлчилгээний чанарын асуудал нь Монгол улс төдийгүй олон улсын хэмжээнд судалж сайжруулах зайлшгүй шаардлагатай байна. Эмнэлгийн үйлчилгээний чанар нь хэрхэн тодорхойлогдож үнэлэгдэж байгаа нь улс орны эдийн засаг, нийгмийн аж байдлыг тодорхойлогч гол хүчин зүйлсийн нэг бөгөөд улс орны, хүний хөгжлийн индексийн өрсөлдөх чадварыг үнэлэх гол хэрэгсэл болдогоороо ач холбогдол өндөртэй байдаг байна.
Үйлчилгээний чанарыг үйлчлүүлэгчдийн сэтгэл ханамжаар үнэлэх замаар өнөөгийн нөхцөл байдлыг тодорхойлж түүний үр дүнд үндэслэн, санал зөвлөмж гаргах зорилго тавьж ажиллахдаа үйлчилгээний чанарыг хэмждэг аргачлалуудыг судлан, тэдгээрийн дотроос бодит байдал болон хүлээлтийн зөрүүгээр үйлчилгээний чанарыг хэмждэг SERVQUAL загварыг сонгон судалгааны ажилыг хийж, гүйцэтгэсэн. Үүнд судалгааны обьект болгон “Хөхний эрүүл мэндийн төв”-ийг сонгон нийт 706 үйлчлүүлэгчдээс анкетын аргаар судалгаа авч түүнийг боловсруулан үр дүнг задлан шинжилсэн болно.
Судалгааны үр дүнгээс харахад үйлчлүүлэгчийн сэтгэл ханамж нь улсын эмнэлгүүдэд хийгдсэн сэтгэл ханамжийн судалгааны үр дүнтэй ойролцоо гарсан болно. Харин ерөнхий бүлэгт багтсан нас, ажил эрхлэлтийн байдлын сэтгэл ханамж нь 31-40 насны болон төрийн ба бизнесийн байгууллагад ажил эрхэлдэг үйлчлүүлэгчдийн хувьд сэтгэл ханамж хангалтгүй гарч байгаа нь цаашид анхаарах асуудлын нэг болж байна. 5 бүлэг үзүүлэлтийн хүлээлт болон бодит байдлын зөрүү 0.63-0.76 гарсан нь 15.75%-19% сэтгэл ханамжгүй байна. Цаашид хөхний эрүүл мэндийн төв нь үйл ажиллагаандаа эдгээр асуудлыг сайжруулах тал дээр анхаарч ажиллавал үйлчилгээний чанар улам сайжрах боломжтой гэж үзэж байна.
