Хураангуй:
Эмнэлзүйн лаборатори нь дэлхий нийтээр эрүүл мэндийн салбарын тулгуур салбар гэж үзэгддэг. Монгол улсын хувьд зүрх судас болон хавдар өвчний шалтгаан нь нас баралтын дийлэнх хувийг эзэлдэг ба эдгээр нь эрт оношлогдвол эдгэрэх бүрэн боломжтой өвчин юм. Гэвч иргэд тогтмол давтамжтайгаар урьдчилан сэргийлэх үзлэг, шинжилгээнд хамрагдахгүй байгаа тул уг өвчлөлүүд буурахгүй байна.. Уг үйлчилгээг үзүүлэгч гол байгууллага нь улс болон хувийн хэвшлийн эмнэлзүйн лабораториуд байдаг.
Иргэд урьдчилан сэргийлэх үзлэг оношилгооны ач холбогдол, үр өгөөжийг төдийлөн сайн мэдэхгүй байна.Үүний нэг шалтгаан нь эмнэлзүйн лабораториуд үйлчлүүлэгчдийн хэрэгцээ шаардлагад нийцсэн үйлчилгээ, маркетингийг хийж чадахгүй байгаа явдал гэж үзэж байна. Тиймээс үйлчлүүлэгчдийн хэрэгцээ шаардлагыг нарийн судалж мэдсэний үндсэн дээр тухайн үйлчлүүлэгчид тохирсон үйлчилгээ, маркетинг хийх нь чухал ач хобогдолтой гэж үзсэн учраас энэхүү судалгааг хийж гүйцэтгэсэн болно.
Эмпирик судалгааг тандалт буюу хоёрдогч өгөгдлийн судалгаа, санал асуулгын судалгаагаар дамжуулан хийсэн. Анкетын судалгааг Улаанбаатар хотын 15-с дээш насны 400 оршин суугчдаас санамсаргүй түүврийн аргаар болон Итгэл эмнэлгээр үйлчлүүлж буй үйлчлүүлэгчдээс онлайнаар (Microsoft form) болон хэвлэмэл байдлаар судалгаа авч үндсэн өгөгдлийг цуглуулна. Цуглуулсан дата дээрээ анхдагч өгөгдлийг SPSS 2.0 програм дээр боловсруулж, давтамжийн шинжилгээ, хамаарлын шинжилгээг тус тус хийж, өгөгдлийн харьцуулалт уялдаа холбоо хамаарлыг тодорхойлон дүгнэлтийг гаргалаа. Уг шинжилгээнүүдийг хийсний үндсэн дээр судалгааны ажлын дүгнэлт, санал зөвлөмжийг боловсрууллаа.
