Арилжааны банкны цахим зээлийн бүтээгдэхүүнийг хөгжүүлснээр ашигт ажиллагааг нэмэгдүүлэх боломж

Abstract

Монгол улсад үйл ажиллагаа явуулж буй арилжааны банкууд нь санхүүгийн салбарын 88 хувийг бүрдүүлдэг. Банкуудын зээлийн багцын талаас илүү хувийг иргэдэд олгосон зээл эзэлж байгаа бөгөөд зээлийн борлуулалтыг уламжлалт буюу салбарын зээлийн ажилтнаар дамжуулан хийдэг, харилцагчийн зээлийн хүсэлтийг шийдвэрлэх хугацаа урт, зээлийн шийдвэр гаргалт удаашралтай байна. Иймээс монголын арилжааны банкуудын ашигт ажиллагаанд инноваци, интернет банкны үзүүлж буй нөлөөллийг тодорхойлох, цахим зээлийн эрэлтийг судлах, цахим зээлийг хөгжүүлж олголтыг нэмэгдүүлэх замаар банкны ашигт ажиллагааг нэмэгдүүлэх боломжийг судлахаар судалгааны хүрээ, дизайны дагуу уг судалгааны ажлаа хийсэн.

Энэхүү судалгааны ажил нь Монгол улсад үйл ажиллагаа явуулж буй 13 арилжааны банкийг бүхэлд нь хамруулсан, ашигт ажиллагаа, интернет банкны хоорондын хамаарлыг авч үзсэнээрээ бусад судалгааны ажлаас онцлогтой болсон.

Монгол улсад төдийгүй олон улсад банкны системийн ашигт ажиллагааг судалсан судалгааны ажил нилээдгүй байдаг боловч банкны ашигт ажиллагаанд интернет банкны үзүүлэх нөлөөллийг судалсан ажил ховор байдаг. Банкны ашигт ажиллагааг илэрхийлж буй өөрийн хөрөнгийн өгөөж, активын өгөөжид банкны дотоод үзүүлэлт болон макро эдийн засгийн гадаад үзүүлэлтүүд нөлөөлдөг. Түүнчлэн банкны үйл ажиллагаанд технологийн дэвшил, инноваци нэвтрүүлэх, төлбөр тооцооны үйлчилгээг сайжруулах нь зардлыг бууруулах, банкны хүүний орлогод эерэгээр нөлөөлдөг болохыг олон улсад хийгдсэн судалгааны ажлуудын үр дүнгээс харж болно.