Хураангуй:
Энэхүү судалгааны ажлаар дотоодын ноос боловсруулах үйлдвэрүүд техник, технологи, инновацийг нэвтрүүлж, нэмүү өртөг шингэсэн бүтээгдэхүүн үйлдвэрлэлийг дэмжих үүднээс үйлдвэрлэлийн өртгийн инженерчлэлийн загварыг санал болгож, удирдлагын шийдвэр гаргалтыг дэмжих санал зөвлөмжийг боловсруулав.
Өртгийн инженерчлэл нь бүтээгдэхүүний чанарыг алдагдуулахгүйгээр үйлдвэрлэлийн хэрэгцээгүй үйлдлүүдийг илрүүлэн устгаснаар үр ашиггүй зардлыг бууруулж, өртгийг удирддаг онцлогтой. Ноос боловсруулах үйлдвэрлэлийн өртгийн инженерчлэлийн загварыг хэрэгжүүлснээр техник, технологи, хүний нөөцийн асуудлуудтай холбогдох хэрэгцээгүй үйлдлүүд илэрч, түүнийг устгаснаар ноосон бүтээгдэхүүний өртөг буурах, мөн бүтээгдэхүүний чанар, гарц сайжирснаар компанийн ашигт ажиллагаанд эерэг нөлөө үзүүлэх болно.
Иймээс ноос боловсруулах үйлдвэрүүд өртгийн удирдлагын орчин үеийн чиг хандлага болох өртгийн инженерчлэлээр хэрэглэгчийн хэрэгцээ шаардлагыг судалж, бүтээгдэхүүний чанарыг алдагдуулахгүй, цаашлаад чанарыг сайжруулж, үйлдвэрлэлд хэрэгцээгүй үйлдлийг илрүүлж устган, үр ашиггүй зардлыг бууруулснаар өртгийг удирдах, дэлхийн зах зээлд өрсөлдөхүйц бүтээгдэхүүний үнэ цэнийг бий болгоход судалгааны ажлын зорилго оршино.
