ХЭРЭГЛЭГЧИД ЧИГЛЭСЭН ХАРИЛЦААНЫ МАРКЕТИНГИЙН ТАКТИКУУД НЬ ХЭРЭГЛЭГЧИЙН ҮНЭНЧ БАЙДАЛД НӨЛӨӨЛӨХ НЬ /ҮҮРЭН ХОЛБООНЫ САЛБАРЫН ЖИШЭЭН ДЭЭР/

Abstract

Өнөөгийн бизнесийн салбарын ширүүн өрсөлдөөнд бизнес эрхлэгчид хэрэглэгчидтэйгээ урт хугацааны үр ашигтай харилцаа тогтоож, үнэнч хэрэглэгчидтэй болохыг чухалчилж байгаа тул 21-р зуунд, ялангуяа үйлчилгээний салбарт хэрэглэгчийн харилцааны маркетинг гэх ойлголтын ач холбогдол өссөөр байна. Бизнес эрхлэгчид хэрэглэгчээ хадгалж үлдэхийн тулд олон төрлийн харилцааны маркетингийн тактикууд ашигладаг ч зарим нь хэрэглэгчдийн үнэнч байдалд үр дүнтэй нөлөөлж чаддагүй тул брэнд солих зан төлөв элбэг тохиолддог. Энэхүү судалгааны ажил нь харилцааны маркетингийн тактикийн хэрэглэгчдийн үнэнч байдалд үзүүлэх нөлөөллийг Монголын үүрэн холбооны салбарын жишээнд суурьлан судлах зорилготой юм. Ингэхдээ шинжих болон тодруулах судалгааны аргыг ашигласан ба судалгааг онлайн хэлбэрээр Улаанбаатар хотын 440 үүрэн холбооны хэрэглэгчдээс хувь хэмжээ тогтоох түүврийн арга ашиглан цуглуулсан. Судалгааны загварыг судлаач Xuan Zhang, Yuanyuan Feng нарын 2009 оны “Шведийн үүрэн холбооны хэрэглэгчийн үнэнч байдлын судалгаа”-нд үндэслэсэн ба судалгааны үндсэн 8 хүчин зүйл, 38 хэмжигдэхүүн бүхий нийт 47 асуулттай асуулга анкет боловсруулав. Өгөгдлийг SPSS 20.0 програм ашиглан нэг талт болон хоёр талт шинжилгээ, хүчин зүйлийн, кластер,болон корреляцийн шинжилгээ хийж, голлох үр дүнг тайлагнав.