Хураангуй:
Аливаа улс орны хувьд эдийн засгийн төлөв байдлаа таньж, ирээдүйн талаар зөв төсөөлөлтэй байх нэн чухал байдаг. Эдийн засгийн нөхцөл байдлыг шинжлэхдээ оновчтой арга зүйг ашиглах нь үүний суурь шаардлага юм. Эконометрикээр шийдвэрлэхэд хүндрэлтэй асуудлыг төлөв байдлын огторгуйн загвар (ТБОЗ) руу хөрвүүлэн Камэны шүүлтүүр ашиглаж хялбар байдлаар шийдэх боломжтой учраас уг аргачлал ихээхэн анхаарал татдаг байна. Харин онолын түвшинд ойлгож, ашиглахад төвөгтэй бөгөөд Монгол улсад, тэр дундаа эдийн засгийн салбарт ТБОЗ болон Камэны шүүлтүүрийн хэрэглээ бага түвшинд байгааг энэхүү хүндрэлтэй холбон тайлбарлаж болох юм. Тус судалгаагаар онол, арга зүйг судлахаас гадна түүний хэрэглээг харуулахын тулд Монгол Улсын бизнесийн мөчлөгийг хэмжихэд ашиглалаа. Судалгааны ажлын зорилго нь сүүлийн жилүүдэд эрчимтэй хөгжиж буй ТБОЗ ба Камэны шүүлтүүрийн онолын ухагдахууныг гүнзгийрүүлэн судлан энгийн, ойлгомжтой байдлаар тайлбарлах билээ.
