Хураангуй:
Хөрөнгийн зах зээлд IPO хийсэн компаниудын хувьцааны үнэ зах зээлд оролцогчдын мэдээллийн дутмаг байдлаас, тодорхой хэлбэл зээлжих зэрэглэлийнх нь талаарх мэдээлэл дутмаг байгаагаас үүдэн унаж байгааг хөндсөн судалгааны ажил бусад улсад нэлээд хийгдсэн байдаг. Хувьцааны үнийн энэхүү уналтаас сэргийлэх үндсэн арга нь компаниудын зээлжих зэрэглэлийг IPO хийхээс нь өмнө тогтоож, зах зээлд оролцогч талуудыг шаардлагатай - найдвартай мэдээллээр нь хангах юм. Нэгэнт IPO хийхийг зорьж буй компаниудын талаарх мэдээллийг олж авах боломжгүй тул энэ дипломын ажилд Монгол Улсын хөрөнгийн зах зээлд IPO хийсэн компаниудаас төлөөлөл болгон сонгосон компаниудын IPO хийсэн үеийнх нь зээлжих зэрэглэл болон өнөө үеийнх нь зээлжих зэрэглэлийг холбогдох санхүүгийн мэдээлэлд нь тулгуурлан тогтоож, хөрөнгө оруулагчдыг найдвартай мэдээллээр хангаснаар хувьцааны үнийн болзошгүй уналт, зах зээл дэх мэдээллийн тэгш бус, хүртээмжгүй байдлын үр дагавараас сэргийлэх боломж байсан эсэхийг тодорхойлох зорилго тавьсан.
