Хураангуй:
Манай улсын эдийн засагт ахиц дэвшил гарахын хэрээр барилгын салбар даган хөгжиж байна. Засгийн газар болон Монголбанк хамтран орон сууцны зах зээлийг дэмжих зорилгоор бага хүүтэй зээлийн хөтөлбөрүүдийг хэрэгжүүлж эхэлсэн. Хөтөлбөр хэрэгжиж эхэлсэнээс хойш 2014 оны 1 дүгээр сарын байдлаар нийт 14685 иргэн шинээр орон сууц худалдан авч, 17105 иргэний 482.4 тэрбум төгрөгийн зээл дахин санхүүжилт хийгдэж, Улаанбаатар хотын хэмжээнд нийт 16500 айлын орон сууц шинээр ашиглалтанд оржээ. Энэхүү орон сууцны зээлийн боломжит нөхцөл нь эрэлтийг ихэсгэж, үнийн өсөлт бий болоход нөлөөлж байна. Энэхүү үнийн өсөлт нь урт хугацаанд эдийн засагт сөргөөр нөлөөлж болзошгүй тул орон сууцны эрэлт болон нийлүүлэлтэд нөлөөлөгч микро болон макро хүчин зүйлсийг тодорхойлж, хэрхэн үнийг тогтвортой түвшинд барих болон бууруулах талаар санал зөвлөмжийг гаргахыг зорилоо.
