Хураангуй:
Уул уурхайн салбарын хувьд дэлхийн нийтийн хандлага 2008 оны санхүүгийн хямралаас үүдэлтэй ашигт малтмалын үнэ огцом унаснаар бүтээгдэхүүний өртөг зах зээлийн үнээс өндөр болсон нь удирдлагуудын зүгээс өртөг хямдруулалт, үйл ажиллагаагаа оновчтой болгоход чиглэн ажиллах болжээ. Уурхайнууд бүтээгдэхүүний өртгийг багасгах, үйл ажиллагаагаа оновчтой байлгах зорилгын хүрээнд алдагдалгүй олборлолт (lean mining) гэсэн зарчмыг уурхайн үйл ажиллагаанд хэрэгжүүлж үнэ цэнийн урсгалын зураглал хийн, үр ашиггүй үйлдлүүдийг тодорхойлж, кайзен өртгийн систем болох тасралтгүй сайжруулалтыг хэрэгжүүлэн бүтээгдэхүүний өртгийг хямдруулж, үр ашигтай ажиллах нөхцөлийг бүрдүүлсэн байна. Манай улсын хүрэн нүүрс олборлогч уурхайнуудад тулгарч буй асуудал нь нүүрсний үнийг түлш эрчим хүчний хорооноос тогтоодгоос шалтгаалан нүүрсний өртөг борлуулалтын үнээс өндөр байна. Уурхайнуудад зардлын шинжилгээгээр түлшний зардал нь 18-20%-ийг эзэлдэг бөгөөд нүүрсний өртгийг бүрдүүлэгч чухал зардал юм. Уг зардлыг хямдруулснаар нүүрсний өртөг буурах боломжтой хэмээн үзэж кайзен өртгийн системийг ашиглан түлшний зардлыг бууруулах аргачлалыг боловсруулж судалгааны ажлыг практикт нэвтрүүлэхийн тулд хүрэн нүүрс олборлогч хувийн компанид хэрэгжүүлэхийг зорилоо.