Хураангуй:
Ажилтны тогтвортой ажиллах байдал нь ажил олгогчдийн санал болгож буй сайн боломжууд, тэдгээрийн биелэлт, эсвэл гэр бүл дэх ажлын байрны эрэлт, эсвэл ажлын өрсөлдөөн дэх ажилтны стрессээс бий болдог. Монгол улсын уул уурхайн компаниудын хувьд ерөнхий байдлаараа хүний нөөцийн дутагдалд ороогүй ч, чадварлаг мэргэшсэн ажилтны эрэлт хэрэгцээ байнгад байсаар байна. Гэтэл хөдөлмөрийн дотоод журам, гэрээ зэрэг баримт бичгүүдийг харахад өрсөлдөөнгүй, ажиллах хүчин хангалттай байгаа мэтээр зохицуулсан байгаа нь ажилтны тогтвортой байдалд сөргөөр нөлөөлж болзошгүй юм.
Асуулгын судалгааны үр дүнг харахад бүрэн дунд болон мэргэшсэн ажилтны тоо нийт ажиллах хүчний 60%, бакалавр, магистр боловсролтой ажилтны тоо нийт ажиллах хүчний 40%-г эзэлдэг. Гэтэл ажилтны эргэлтийн хувь нь боловсролын аль ч түвшний хувьд жилд 22% байна. Эндээс харвал боловсролын түвшин нэмэгдэх тусам ажилтны тогтвортой байдал суларч байна гэж дүгнэж болно.
Аливаа байгууллагын ажилтны тогтвортой ажиллах байдалд 7 хүчин зүйл нөлөөлөх боломжтой байдаг бөгөөд манай улсын уул уурхайн салбарт үйл ажиллагаа явуулах компаниудын хувьд ажилд авах ба сонгон шалгаруулалт, гүйцэтгэлийн үнэлгээ, нийгмийн халамж, карьер өсөлт, ажил амьдралын тэнцвэр 5 хүчин зүйл нь ажлын сэтгэл ханамж, ажилтны тогтвортой байдалд нөлөөлнө гэж судалгааны үр дүнд гарлаа. Анхаарал татсан зүйл нь сэтгэл ханамж, тогтвортой байдалд аль алинд нь ажил амьдралын тэнцвэр нөлөөлнө гэж гарсан тул компаниуд энэ тал дээр илүү түлхүү анхаарах шаардлагатай.
