Аялал жуулчлал

АЯЛАЛ ЖУУЛЧЛАЛЫН САЛБАРЫН ХҮНИЙ НӨӨЦИЙН ЭРЭЛТ ТОДОРХОЙЛОХ /ТУР ОПЕРАТОР КОМПАНИЙН ЖИШЭЭН ДЭЭР/

2026-10-26T05:27:52Z

АЯЛАЛ ЖУУЛЧЛАЛЫН САЛБАРЫН ХҮНИЙ НӨӨЦИЙН ЭРЭЛТ ТОДОРХОЙЛОХ /ТУР ОПЕРАТОР КОМПАНИЙН ЖИШЭЭН ДЭЭР/ Амгаланбаатарын, АМАРБАЯСГАЛАН Аялал жуулчлалын салбар нь тухайн улсын өв соёл , түүх , нөөц бүтээгдэхүүныг дэлхий дахинд гарган таниулах зорилготой түүнчлэн байгальд ээлтэй, нийгэм-эдийн засагт хувь нэмэр оруулах, ирээдүйд тэлэн өргөжиж цар хүрээгээ тэлэх чадвартай, ажлын байрыг бий болгож, нарийн ур чадвар мэдлэг шаарддаг, эдийн засгийн бусад салбаруудад харилцан хамааран үр өгөөжтэй байдгаараа онцлог салбар юм. Бидний мэдэж байгаагаар аялал жуулчлал нь үйлчилгээнд суурилсан салбар бөгөөд бүтээгдэхүүн нь биет бус шинж чанартай байдаг. Энэ салбарын гол хүчин зүйлүүдын нэг бол хүний нөөцийн алба юм. Ресторан, Зочид буудал, жуулчны баазаас эхлээд тур оператор компани хүртэл хүнээс хүн рүү харилцдаг. Дэлхийн улс орны аялал жуулчлалын нөөц , бүтээгдэхүүн өсөн нэмэгдэж байгаатай холбогдуулан хүний нөөцийн хомсдол үүсэж байна. Монгол орны хувьд ч бас хүний нөөцийн хомсдолд 50-78 хувь хүрсэн байна.

Аудитын мөнгөн нэгжийн түүвэрлэлтийн процессыг ms excel ашиглан автоматжуулах нь

2026-09-15T04:00:29Z

Аудитын мөнгөн нэгжийн түүвэрлэлтийн процессыг ms excel ашиглан автоматжуулах нь Мөнхбат, Хүслэн Энэхүү судалгааны ажлын зорилго нь аудитын мөнгөн нэгжийн түүвэрлэлтийн үндсэн процессыг судалж, бодит байгууллагын өгөгдөлд тулгуурлан уг процессыг MS Excel орчинд хэрэгжүүлэх автоматжуулсан загвар боловсруулахад оршино. Судалгаанд нэрийг нь нууцалсан аж ахуйн нэгжийн 2024 оны харилцах дансны зарлагын гүйлгээний өгөгдлийг ашигласан. Судалгааны хүрээнд аудитын мөнгөн нэгжийн түүвэрлэлтийн онол, арга зүйн үндсийг судалж, олонлогийн дүн тодорхойлох, түүврийн хэмжээ тогтоох, түүврийн интервал тооцох, selection point үүсгэх, түүвэрт хамрагдах гүйлгээг тодорхойлох зэрэг үндсэн үе шатуудыг MS Excel орчинд загварчилсан. Мөн гүйлгээний шинж чанарт суурилсан аналитик шинжилгээ хийж, бүхэл дүнтэй, давхардсан, амралтын өдөр хийгдсэн болон өндөр эрсдэлийн ангилалд хамаарах гүйлгээнүүдийг тодорхойлсон. Үүнээс гадна Benford-ийн хуулийг дэмжих шинжилгээний түвшинд ашиглан өгөгдлийн тархалтын шинжийг үнэлсэн. Судалгааны үр дүнгээс харахад боловсруулсан Excel загвар нь мөнгөн нэгжийн түүвэрлэлтийн үндсэн үйл ажиллагааг нэгтгэн хэрэгжүүлэх, гар ажиллагааг бууруулах, мөн аудитын анхаарал шаардлагатай хэсгийг илүү үр дүнтэй тодорхойлоход дэмжлэг үзүүлж байгааг харуулсан. Иймээс уг загвар нь аудитын үйл ажиллагааны үр ашиг, боловсруулалтын уялдаа болон практик хэрэглээнд ач холбогдолтой гэж үзэж байна.

Орон нутгийн сонгуулийн сонгогчдын шийдвэр гаргалтанд нөлөөлж буй хүчин зүйлийн судалгаа Хэнтий аймгийн жишээн дээр

2026-07-02T12:36:16Z

Орон нутгийн сонгуулийн сонгогчдын шийдвэр гаргалтанд нөлөөлж буй хүчин зүйлийн судалгаа Хэнтий аймгийн жишээн дээр Сугар, Болормаа Орчин үеийн ардчилсан нийгэм дэх улс төрийн системийн тогтвортой байдал, бодлого боловсруулах үйл явц нь сонгогчдын зан төлөв, тэдний шийдвэр гаргах логикоос шууд хамаардаг. Монгол Улсын хувьд 2024 оны сонгуулийн тогтолцооны шинэчлэл буюу холимог системд шилжсэн явдал нь сонгогчдын төлөвшилд шинэ сорилт, боломжуудыг бий болгож байна. Энэхүү судалгааны ажил нь Хэнтий аймгийн сонгогчдын зан төлөвийн өнөөгийн байдлыг тодорхойлж, тэдний сонголт хийхэд нөлөөлж буй социологийн, сэтгэл зүйн болон рациональ хүчин зүйлсийн хамаарлыг шинжлэх зорилготой юм. Хэнтий аймаг нь Монголын улс төрийн манлайллын түүхэн болон стратегийн онцлог бүс нутаг болохын хувьд сонгогчдын төлөвшлийг тодорхойлох жишиг судалгааны талбар болж байна. Судалгааны арга зүйн хүрээнд тоон судалгааны аргыг ашиглан Хэнтий аймгийн сонгогчдын төлөөлөл болох 400 орчим респондентоос санамсаргүй түүврийн аргаар анкетын асуумж авч, цугларсан өгөгдлийг SPSS программ ашиглан статистик шинжилгээнд орууллаа. Шинжилгээгээр сонгогчдын хүйс болон шийдвэр гаргах хандлагын хооронд статистик ач холбогдол бүхий маш хүчтэй хамаарал ($p < 0.001, \chi^2=116.643$) байгаа нь тогтоогдсон бөгөөд эмэгтэй сонгогчид сэтгэл зүйн болон нийгмийн хүчин зүйлийг илүүтэй чухалчилж байгаа бол эрэгтэй сонгогчдын хувьд рациональ болон улс төрийн хүчин зүйлс давамгайлж байна. Түүнчлэн Хэнтий аймгийн сонгогчдын дунд рациональ сонголтын үзүүлэлт нэмэгдэж байгаа хэдий ч бодит шийдвэр гаргалт дээр "Лидерийн нөлөө" болон "Нутгархах үзэл"-д суурилсан социологийн хүчин зүйлс шийдвэрлэх үүрэг гүйцэтгэсэн хэвээр байна. Залуу үеийнхний улс төрийн социализацид мэдээллийн технологи, сошиал медиа гол суваг болж байгаа ч тэдний сонголт уламжлалт институциональ хандлагаас бүрэн ангижраагүй байгаа нь ажиглагдлаа. Энэхүү судалгааны үр дүн нь сонгуулийн тогтолцооны шилжилт сонгогчдыг илүү бодлого төвтэй сонголт руу хөтөлж байгаа ч орон нутгийн онцлог, хувь хүний хүчин зүйл сонголтод хүчтэй нөлөөлсөн хэвээр байгааг баталж байна. Иймд сонгогчдын улс төрийн боловсролыг дээшлүүлэх, намуудын бодлогын өрсөлдөөнийг орон нутгийн прагматик хэрэгцээнд нийцүүлэх замаар сонгогчдын зан төлөвийг илүү рациональ хэлбэрт шилжүүлэх шаардлагатай байгааг дүгнэж байна. Энэхүү бүтээл нь орон нутгийн сонгуулийн стратегийг тодорхойлох, сонгогчдын зан төлөвийн өөрчлөлтийг хянах онол, практикийн ач холбогдол бүхий суурь мэдээлэл болно.

Кофе шоп үйлчлүүлэгчдийн худалдан авах эрмэлзэлд нөлөөлөх хүчин зүйлсийн судалгаа

2026-09-16T02:25:27Z

Кофе шоп үйлчлүүлэгчдийн худалдан авах эрмэлзэлд нөлөөлөх хүчин зүйлсийн судалгаа Цогбадрах, Номундарь Энэхүү судалгааны зорилго нь Сүхбаатар дүүргийн Фантам орчимд үйл ажиллагаа явуулж буй кофе шоп хэрэглэгчдийн худалдан авах эрмэлзэлд нөлөөлөх хүчин зүйлсийг тодорхойлж, хэрэглэгчийн зан төлөвт тулгуурласан бодит дүгнэлт гаргахад оршсон. Уг зорилгын хүрээнд хэрэглэгчийн зан төлөвийн онол болон өмнөх судалгаанд тулгуурлан 9 хүчин зүйлсийг багтаасан загвар боловсруулж, 410 хэрэглэгчээс тоон судалгаа авч, SPSS программ ашиглан фактор болон регрессийн шинжилгээ хийсэн. Шинжилгээний үр дүнгээс харахад байршил, идэвхжүүлэлт, биет орчин, амьдралын хэв маяг зэрэг хүчин зүйлс худалдан авах эрмэлзэлд статистикийн хувьд утгатай нөлөө үзүүлсэн бол бүтээгдэхүүн, үнэ, хүний нөөц, үйл явц, эрүүл ахуй зэрэг хүчин зүйлсийн нөлөө батлагдаагүй байна. Харин ярилцлагын судалгаагаар бүх хүчин зүйлсийг ач холбогдолтой гэж үзсэн ч бүтээгдэхүүн, үнэ, эрүүл ахуйг хэрэглэгчид зайлшгүй байх ёстой суурь нөхцөл гэж үнэлж, ялгарах хүчин зүйл биш болохыг онцолсон. Судалгааны үр дүнгээс дүгнэхэд кофе шоп хэрэглэгчийн худалдан авах эрмэлзэл нь зөвхөн уламжлалт маркетингийн хүчин зүйлсээс бус, харин орчны туршлага, байршил, идэвхжүүлэлт болон амьдралын хэв маяг зэрэг хүчин зүйлсийн нийлмэл нөлөөн дор бүрэлдэн тогтдог байна. Энэ нь орчин үеийн хэрэглэгчийн зан төлөв илүү туршлага төвтэй болж өөрчлөгдөж байгааг харуулж байна.